黃智賢曾經歷愛犬CoCo離世，傷痛過後，他遇上摩天使Cream Cream和Tea Cup貴婦Pepper，生活再度添上新色彩，他直言：「佢哋為我嘅生活帶嚟好多歡樂，對住佢哋好減壓，就算對住紛紛擾擾嘅娛樂圈，返到屋企見到佢哋即刻安靜晒。」
撰文：何慧斯
黃智賢（Ben）回想當日與貴婦狗Pepper相遇，他笑說：「嗰陣CoCo（約瑟犬）走咗，真係好傷心，我同老婆都覺得間屋要養番隻狗，但係刻意唔養約瑟，因為有太多回憶，少不免會有比較，所以咪姑且試吓養其他品種嘅狗。嗰陣我哋搵咗好耐，見到Pepper啲神情，嗰種嗲，好似以前隻CoCo，呢啲就係眼緣，揀咗好耐終於揀咗佢。」
其後Ben遇到摩天使Cream Cream，又再被牠俘虜，他笑說：「因為上次經驗係養咗一隻狗，所以想有多一隻做伴，但係冇必要買同一個品種，結果我哋偶然遇到Cream Cream，見到個店主同佢梳毛，佢眼神衰衰咁，有啲楚楚可憐，真係冥冥之中安排。」
因為Pepper當時有皮膚病，在寵物店住了一個月，變相令Cream Cream成為大家姐，Ben說：「Cream Cream佢好友善，但係我成日同佢講，叫佢唔好蝦個妹呀。我仲會叫佢做happy dog，佢最鍾意玩同食，只要擺低啲嘢食，唔使一分鐘可以食晒，瞓覺又唔使三秒就瞓着，真係食得快瞓得快。」
無微不至當湊女
直至Pepper痊癒才回家，牠跟Cream Cream相處很融洽，完全沒有呷醋，更因這對小寶貝增添了不少歡樂氣氛，Ben說：「佢哋啲百厭嘢令你好好笑，無論跌咗乜嘢落地，都會即刻叼走，據為己有，雖然佢哋唔會抓傢俬，但係會咬鞋帶，仲試過喺高踭鞋瞓覺，有一次玩到全屋都係廁紙㖭！佢哋仲會有個午夜場，最鍾意瞓到半夜起身，玩一陣先會再瞓番。」
Ben續說：「𠵱家我哋好開心，已經當咗佢哋係屋企嘅一分子，只要開工有啲空檔，都會返一返屋企見吓佢哋，又或者因為掛住佢哋早啲返屋企，甚至連去旅行都少咗，如果出門唔知擺佢哋畀乜嘢人湊好。」
拍攝當日，阿Ben不但預備手推車接載一對寶貝，同時帶備各種玩具、水樽，儼如爸爸對子女般無微不至的照顧，他說：「一啲啲啦，仲差好遠，始終狗仔易教啲，佢哋又有伴，會自動波自己玩，又或者各自各走埋一邊瞓覺，佢有佢哋嘅世界，你見到佢哋好安樂，瞓到反晒肚，反映佢哋覺得呢個環境好安全，好放心，當咗呢個係佢哋個家，見到佢哋好滿足。」
飲食方面要小心
Ben更有感而發地說：「逐漸你會覺得佢哋唔係寵物，係屋企嘅一分子，上次養狗仔嘅經驗，佢係講唔到畀你聽邊度唔舒服，無論佢幾多歲都好，喺我眼中都係小朋友，所以我哋喺飲食方面好小心，尤其係揀糧，我哋會諮詢吓醫生，同埋會買啲優質嘅糧，唔會畀零食佢哋，亦唔會話同佢慶祝生日買蛋糕，好似𠵱家好興買鞋仔，呢啲我真係唔係好接受，狗有狗嘅世界，人有人嘅世界，錫佢哋都要保留番佢哋嘅性格，做狗有做狗嘅尊嚴。」