上個禮拜，三色台的《老表，你好嘢！》播映後，引起坊間陣陣熱話，報紙不間斷報道呢套劇集收到幾多宗投訴，一時就話會被腰斬，一時又話開續集。雖然平時我對無綫劇集不太感興趣，也甚少追來睇。但一來八卦，二來因為種種報紙評論，為咗唔想俾啲姊妹話out，惟有趁放假煲番幾集。
平心而論，我覺得套劇算係出眾（只怪眾劇平庸），亦有別平時一般的無綫劇集。最起碼係選角方面有啲心思，敢於起用新面孔，令人眼前一亮。例如長腿姐姐萬綺雯、王菀之、細細粒陳嘉佳、鬼妹陳明恩和黃光亮。
配搭新奇之餘，亦終於有套戲唔使見到張國強。其實我覺得KK哥哥啲戲係做得唔錯，但套套劇都見，而且角色髮型都差唔多，好悶，兼且都係類型相近，有時都唔知自己睇緊邊齣囉。
另外，《老表》的題材新鮮，緊貼時事都是吸引我的原因之一。Thanks God，終於可以擺脫獨沽一味的家族爭產、無日無之的三角愛、宮闈戀，亦不需要再忍受啲重口味的強（行加插，無嚟啦）姦劇情。呢套劇反映自從開放自由行後，因而引發的中港矛盾及日益加劇的社會衝突；將名店狗眼看港人低，sales只對普通話人才會笑面相迎的嘴臉再一次在公仔箱呈現；銅鑼灣、尖沙嘴、旺角的舖位因要迎合強國人口味而變成珠寶金飾街、電器街同埋化妝品街的現象如實反映。
肯創新反招投訴 自相矛盾
好多人常常批評無綫沒有競爭，一台獨大，拍劇取材了無新意。到今次《老表》嘗試以一些新內容，反映時事，拍出寫實的社會現況，重演「導遊珍」、「啲&豬」影相及巴打唱蝗蟲歌事件，又話劇集譁眾取寵，醜化香港人，影射我哋勢利及貪錢心態，傷害弱小心靈，所以要打去通訊事務管理局投訴。
要有創新意念及創作空間，最重要的是自由及包容的土壤。一邊話沒有新意，另一邊廂又不接受，甚至妄圖限制及扼殺題材諷刺、意念創新的作品，顯得有點自相矛盾，亦顯示出社會的包容和接受程度日益狹窄。
《老表》一劇有新意念、新演員、新配搭，對白抵死好笑（起碼我就笑咗！），所以我撐《老表》！其實由此劇收視率就可以輕易得知好多人都係口不對心，一路睇，一路鬧，一路打電話去投訴。不過呢個也是香港「核心的核心價值」，我哋得享言論自由，鍾意讚又得，鍾意彈都得，得咗。
編按：是日由盧主席秘書Joycelyn執筆。
Joycelyn