呢兩日恒指橫行，好明顯比一兩個星期前指數橫行時，冇咁好炒，炒股不炒市嘅空間越嚟越細。噚日恒指微跌36點，扣除中移動（941）跌2%，大市幾乎冇升跌，以為好硬淨，實情係整體上市股份只有400隻多啲上升，卻有大約800隻下跌，即係你買3隻股，有兩隻跌緊，輸多過贏。
噚日仍有一批股份急升，例如內房殼股星獅地產（535）破頂爆上兩成，近期升咗好多嘅BB奶粉股雅士利（1230）、合生元（1112）噚日又爆上半成，好容易畀投資者錯覺，以為仍然可以炒股不炒市，但實情係市底一日衰過一日。
雖然港股前幾日破頂，但同時出現唔少利淡訊號，例如橫行時成交縮、港滙轉弱、二三線股洗倉等，不過，咁多利淡訊號出咗嚟，恒指、重磅股依然跌唔落，咁係咪代表冇嘢可以推低個市呢？
A股現射擊之星
晉佳覺得，嚟緊港股最大嘅考驗，就係點樣應付A股可能出現嘅跌勢。上證綜指由1月初至今，9RSI形成咗典型三頂背馳訊號，呢個訊號出現喺股指身上，準繩度相當高，加上噚日因為北韓核試單嘢令A股先升後跌，陰陽燭出現埋短線利淡嘅射擊之星，睇嚟會好快見方向──衰嘅居多。
港股靠乜嘢嚟頂住A股下跌呢，如果A股跌，H股斷估都會跌，而本地地產股亦同樣超買，所以好難寄望A股跌嘅話，恒指仲可以出現強大承接力。
呢個moment勝算真係唔高，晉佳寧願靠邊站一陣，所謂一陣，可能維時兩個月，點解咁耐？原因係嚟緊大市無論係調整或破頂，都要預咗chok住咁進行，咁樣最蝦人玩。由於近期唔少投資者食咗糊，轉趨審慎，大戶要散戶嘔番利潤出嚟，其中一個方法係個股出現無數次假突破，令投資者以為調整完，入市博升市重臨，連番博殺就會連番中招。因此，晉佳建議嚟緊短炒可免則免，買股策略應該改為以恐慌性買入為主，只有投注喺基本因素同時股價跌過龍嘅股先有出路。
晉佳
本欄逢周一、三及五刊出