【台北】去年捲入台灣淫少李宗瑞偷拍風暴嘅女星吳亞馨，被台灣《壹週刊》踢爆翻撻舊愛朱孝天，有人報料話佢哋同遊日本，喺上周二搭華航班機由東京返台灣，兩個人仲刻意前後腳出閘，喺同日下晝，佢哋被影到出入同一大廈，之後吳亞馨仲夜訪朱孝天屋企，當堂斷正！
上周二（15日）下晝4點幾，朱孝天由友人揸車去和平西路一幢大廈，之後佢單獨落樓上車兜咗40分鐘。
夜訪男友家
之後素顏嘅吳亞馨落樓，上埋朱孝天坐嗰架車，冇耐佢哋發現有記者追訪，吳亞馨即刻落車改搭的士去松山機場，仲急call媽咪嚟接佢，到深夜11點幾，吳亞馨以為撇甩記者，自己揸車直駛朱孝天屋企，令兩人復合曝光。
據知，自李宗瑞事件後，朱孝天喺微博公開鼓勵吳亞馨，兩人患難見真情，復合兩個月，更傳婚訊。吳亞馨噚日回應話：「氣死了都亂寫，我才剛要重新出來，寫我結婚，誰還找我啦！」佢仲否認同朱孝天出國，至於當日同車，佢話：「那天是去他介紹的推拿師那裏遇上，他順路送我，看到狗仔我覺得奇怪，他說當天是他生日，可能是來跟他的。」
撰文：林妃
