財務F突然上到左丁山辦公室傾吓時事，事關佢在威靈頓街吃過午飯，未到下一個約會時間，諗到左丁山人在中環，於是上嚟「謀殺半小時」。佢見到左丁山房間凌亂不堪，書本報紙堆積如山，地板上又有不少環保袋，袋內有剪報，不禁大笑：「教你一個辦法，趁新年將至，搵個吉日，叫秘書大掃除，你就走咗去街冇眼睇，返到嚟包保企理乾淨。」點解自己唔做大掃除，要由秘書代理？財務F話：「我試過一次自己做，點知做咗八小時還未丟掉一半，因為自己執吓，睇吓，有啲又唔捨得，結果費時失事。秘書就唔同，佢對啲舊報紙冇感情，掃除又快又徹底。」
都明白嘅，好多資料其實如有需要，現在可以在互聯網搵得到，我地收收埋埋啲舊報、舊雜誌以至新書舊書，其實係出於感情作用，為咗啲舊物仲要交多啲租。
講起「拋書棄報」，財務F話佢收到太古地產一個電郵，大家可以考慮。太古地產在一月二日起至三月二十四日止，展開為期三個月嘅書籍回收活動，收集到嘅書本，會在四月十八日至二十日期間在鰂魚涌太古坊Artis Tree舉行舊書義賣，每本書賣十蚊，等弱勢社群有機會買到一啲新書、舊書、暢銷書，2009年第一次舉辦呢個「書出愛心十元義賣」活動，反應好熱烈，今年再次舉行。
嘩，捐書容易，送書出門難啲噃，財務F話：「早知有你呢類大牌明星，太古地產話在太古地產管理嘅物業，小童羣益會有書本收集箱，你捐得多，可以安排上門收書，到中環搵你！」唔，咁就想得周到，可以認真考慮吓呢個「書出愛心十元義賣」活動，讀者有興趣，不妨捐書捐埋一份喎。如有查詢，打電話去太古地產搵傳媒關係經理可也。財務F走咗唔夠十五分鐘突然又再拍門，佢手持五盒外賣，話送一盒俾左丁山，作為佢走上嚟kill time嘅報酬。搞乜鬼？佢話經過史丹利街，見到午飯過後仍然有人在一間燒鵝飯店排隊，好奇之下，走埋去，得知係米芝蓮一星燒鵝店，於是買咗燒鵝及燒鵝髀返公司俾秘書及手下食，買多一隻鵝髀俾左丁山。有米芝蓮星真係緊要，好彩呢間唔係名大於實，燒鵝係有水準嘅，唔係鄧達智筆下嘅雲吞麵店。