個市高位繼續chok，悲觀派認為十個牛皮九個淡，加上港滙轉弱，大市已屆強弩之末；樂觀派就話各板塊輪流發威，好似殼股及前海概念，證明資金繼續在股市游走。唐牛純粹用人性分析︰身邊戰友依然且戰且走，某程度上反映散戶未全程投入，根據相反理論，後市仲有得去。
施政報告房屋政策只講供應，冇再出手壓樓市，無殼蝸牛即刻盲搶樓，樓市爆發小陽春。綠悠雅苑及白表免補地價買二手居屋申請突破10萬宗，樓市需求大得驚人，兩者分別於2月及5月公佈抽籤結果，由於名額只得6000個，屆時近10萬個落空者會轉戰一二手市場，樓市狂歡派對一觸即發，美聯集團（1200）第一個開香檳。美聯去年上半年賺1.3億銀，按年雖跌37%，但盈利已相當於去年96%，如果下半年控制成本得宜，隨時發盈喜，加上中期息率達3.6厘，防守力一流。昨收3.99元，跌2.4%，相信超買已消化得七七八八，現價買入，中線博兩成升幅唔過份。
唐牛