市建局執行董事譚小瑩今年3月升做行政總監，獵頭公司上星期開始幫市建局登招聘廣告請人，頂番譚小瑩執董個位，廣告登咗七點人選要求，其中一點要求應徵者「具備高度誠信，傑出領導經驗，策略性及創新思維，超卓溝通能力及良好商業觸覺」，就連本身做測量師嘅CY都符合唔到呢堆形容詞啦。
市建局要求相當高，要熟識地產行業，最好做過具規模嘅地產公司、商業機構等，曾促成過大型地產發展項目、熟政府同公營機構運作、15年以上高層管理經驗等，照睇只有做開藍籌地產公司嘅先啱。
之但係，市建局執董嘅年薪唔算高，譚小瑩舊年年薪340萬，行政總監羅義坤都係得510萬年薪，相對長實（001）、恒地（012）執董過千萬年薪，真係蚊髀同牛髀。