如閣下有玩Candy Crush，就會深深體會何謂「糖衣毒藥」。呢排行街、食飯定坐地鐵，都一定見到有人玩緊呢個Game。連一向好少沉迷手機遊戲嘅菲菲都中招，完全「糖毒」上腦。
Candy Crush玩法係將相同顏色嘅糖連成直線攞分。聽落簡單，但可以令咁多人失控，係因為遊戲有一個恐怖嘅元素──同fb連線。你會見到朋友玩到第幾關，喺好勝心驅使下，會好想快啲過關，唔好落後。慾望係無止境嘅，當成功超越一個人後，你就會想超越另一個，如是者，「朋友」曲線成為你玩落去嘅原動力。更邪惡嘅係，當你連輸幾局並用盡「生命」，你以為可以有藉口休息啦，但fb朋友卻在此緊要關頭向你伸出友誼之手，賜你「生命」等你有命繼續玩。
玩到可以彰顯人性光輝咁誇，開發商King.com真係想唔紅都好難。𠵱家個Game每日吸引到970萬名玩家去炸糖，或者過一排，仲會吸引投資者「買糖」，將成間公司收購，呢個預測，算合理吧！
Fifi
本欄逢周二、四刊出