以往香港大年初一嘅節目都比較平淡，好多舖頭都未開門，好彩球迷仲有賀歲盃解吓悶；今年香港繼續搞蛇年賀歲盃外，連美斯都有份賀歲！不過呢位球王唔係嚟香港，只係大年初一（2月10日）正值周日，西甲安排巴塞隆拿首度出戰中午場，即係香港時間黃金時間晚上7點喺主場迎戰基達菲啫。
西甲聯賽會由上季開始增設周日中午場，喺西班牙時間周日正午12點開波，以迎合亞洲球迷需要；不過巴塞基於宗教、球迷習慣等理由，一直都好抗拒踢周日早場，上季完全冇份踢。不過宜家西班牙經濟有幾差，都唔使我求大俠多講，連巴塞球王美斯，都要拍日本男性護膚品廣告；仲大講日文「kimochi ii」（好舒服）㖭，所以巴塞都要向現實低頭，出戰周日中午場嘞。
撞正港聯下半場
香港賀歲波搵邊隊同巴塞對撼？頭場係由新一季升上中超嘅上海上港，對泰超冠軍蒙通聯，講真我求大俠真係唔係好識兩隊有咩人。尾場好少少，由港甲精英組成嘅香港聯賽選手隊，對韓職嘅釜山偶像；不過場波5點半先開波，下半場同巴塞撞晒時間，如果係港隊同巴塞嘅瘋狂球迷，或者都要準備部平板電腦，一邊現場睇賀歲波，一邊上網睇巴塞。如果仲唔夠喉，英超尾場都有唔錯戲碼，由榜首嘅曼聯，主場對爭前4嘅愛華頓㖭。
講開西甲周日中午場，西班牙另一班霸皇家馬德里，嚟緊星期日都會踢，對手又係基達菲；上季皇馬就踢過早場，結果主場狂炒奧沙辛拿「七個一皮」，據報中國、日本等亞洲地區，收睇直播嘅人次仲過億，又難怪皇馬咁賣力；基達菲連續兩次早場分別面對皇馬同巴塞，真係自求多福嘞。