滙豐送錢搞推廣！滙豐舊年搞咗個有獎問答遊戲，大獎得主李女士只係上網睇咗幾段片，再答幾條問題，就被抽中得到128萬，不過唔係現金，而係退休儲備，要用來買番滙豐嘅理財產品。
睇片答問題sell產品
李女士就揀咗滙豐其中一款年金，每個月好似出糧咁攞錢，雖然唔可以即刻攞去瘋狂濕平，但無端端有嚿錢儲起，有息收，都開心嘅。
除咗得獎者，滙豐都應該好開心，因為參賽者要睇咗佢哋推銷退休產品嘅宣傳片，先可以答問題，斷估呢招應該有啲宣傳效用，否則佢哋都唔會食住個勢，今日開始推出第二輪網上問答遊戲。之但係今次大獎就縮咗水，冇128萬咁多，最多都係得88萬8千蚊，唔通要縮皮？