近年出事民企多到10隻手指數唔晒，有啲情況特別誇張騎呢，仲奇情過《幻海奇情》，海迪睇到忍唔住哈哈大笑。講緊嘅係奶粉股大慶乳業（1007），公司自去年初停牌以來，一直唔見積極處理核數師德勤對賬目造假的質疑，董事跳船的跳船，管理層就繼續留喺大老遠的哈爾濱，港交所（388）似乎都冇乜符。
上兩星期大慶出咗張通告，話哈爾濱攝氏零下32度好鬼凍，搞到office啲暖氣管爆裂，水浸一、二樓，對電腦同文件「造成廣泛破壞」，聽落好陰公！點知到咗第二日，大股東個仔兼公司主席趙宇、仲有CFO方秉權，分別用「郵遞」及「email」方式，發辭職信畀董事會，趙宇話為咗令公司「可更靈活地處理挑戰」，所以忍痛離開。而方秉權就仲搞笑，話原來舊年6月已經想閃人㗎喇，但被董事會同德勤扯住，叫佢check埋條數先，但𠵱家公司因為水浸，會計紀錄都已經「唔存在」，所以方秉權話自己「冇貢獻」，可以辭職咁話！果然係「有燈就有人、有mail就走人」！
前幾日趙宇的老豆、大股東趙傳文都辭埋職，理由係身體唔好。大慶現時只剩一個執董和一個獨立非執董，到底上市集資嗰10幾億去咗邊？公司仲點復牌？睇嚟又會成為一宗無頭公案了。
海迪