雖然中移動（941）董事長奚國華舊年3月開始，接替王建宙做中移動揸弗人，但由於王總退休後不時接受內地傳媒訪問，令到佢嘅「中移動揸弗人」形象有增無減。
高級顧問 英文夠照
噚日代表全球八百幾間流動電訊商利益嘅GSMA（全球流動通訊系統協會）仲宣佈，委任王總做協會高級顧問，為成個產業搵新機會同推動行業發展。
喺多位中資電訊老總中，王總嘅英文水平的確算係最高之一，佢當年出席GSMA論壇時都係用英文直接同外國電訊商代表交談，唔知今年GSMA論壇，王總會唔會代表大會訪問番中移動管理層呢？
仲記得奚總曾經透露，王總退休後有長遠打算。原來佢嘅長遠打算係繼續為業界服務，退而不休。咁又係，王總只係64歲，𠵱家男人60歲都唔算老，84歲嘅誠哥都好精靈啦。