早前應屆港姐季軍朱千雪享受一次畢身難忘的浮誇杜拜之旅，她為無綫拍旅遊特輯，同行的還有陳百祥和陶傑。他們前往一個鄰近杜拜名為Ras Al Khaimah的沙漠，入住Banyan Tree Al Wadi酒店，化身成為沙漠公主，在這片綠洲中暢泳。
撰文：楊潔雯
朱千雪今次三日兩夜的沙漠浮誇之旅，她坦言興奮莫名：「杜拜咁貴已經冇諗住去，今次仲係要去沙漠住超豪酒店，第一日入夜去到酒店門口，仲要開十分鐘車先到酒店大堂，可想而知間沙漠酒店有幾大，我哋每個人住一間獨立屋，房間糅合阿拉伯同現代化設計，每間屋有一個私人泳池，有成15米長，仲要對住個沙漠，喺沙漠游水係咪好浮誇？」
親手餵獵鷹
第二日朱千雪走到沙漠開餐，一邊睇日落，一邊燒烤，她說：「喺沙漠營火會，畢生第一次，個沙漠乜嘢都冇，佢哋突然搵咗個地方，喺四周圍插晒火把，廚師喺一邊燒烤準備晚餐，我哋就睇住個太陽落山，真係好浪漫！入黑成班人一齊BBQ，天上面係一望無際嘅繁星，真係好靚、好靚！」
行程到最後一日，朱千雪晨早去沙漠中找獵鷹，她笑說：「我一早就去搵劉德華，哈哈！隻獵鷹係當地人養，最鍾意食生牛肉同雞心，我本來唔係好鍾意動物，但係見到今次機會難逢，最終克服自己心理障礙，勇敢面對迎面飛嚟嘅獵鷹，當佢衝過嚟喺我手上拎走塊生牛肉嗰刻，我真係好興奮！」
去邊度：杜拜
玩幾耐：三日