劉江華跌咗個橙執番嚿金，突然入咗政府做副局長，至於佢原來喺民建聯嘅副主席位，一直懸空，直至4月改選。呢個咁位高權重嘅位，據聞都有唔少人爭，尤其係上位中嘅新星。咁點樣擺平好呢？黨內高層傾向，多一事不如少一事，建議搵秘書長彭長緯頂上，覺得咁就一了百了。
但八方聽聞，08年拍住劉江華新東參選嘅陳克勤，同樣有機會做副主席喎。點解呢？原來佢哋想畀多啲機會年輕人上位，所以準備喺新一屆換領導層時，增設多一個副主席，由年輕人出任，至今最熱之選係陳克勤，事關佢入過政府、做過區議員兼做埋立法會議員；如果升佢，其他同輩應該冇聲出啩。至於彭長緯，過去多次上位機會失之交臂，多一次，唔多，估唔到又劉江華累事啫。