早兩日晉佳話港股短線破咗頂，高位起碼整固兩日先有機會掉頭，所以當時短炒都仲有水位，但經過噚日禾雀亂飛，非指數股份炒到癲晒，唔少股份已經超買再超買，好多股已經揀唔落手。
如果睇藍籌，本地地產股同內銀股已經升到爆晒錶，又係超買完再超買，其中，工行（1398）出現9RSI三頂背馳，建行（939）RSI雖未背馳，亦同樣三浸挑戰80。晉佳諗呢刻只有大戶成手貨，繼續掃高等散戶接貨，否則搵鬼新入場再買上去。
睇牌面，芸芸藍籌股之中，最有條件爆上嘅非中移動（941）莫屬，原因係中移動短線呈跌勢，9RSI跌到32左右，唔超買反而超賣，如果大戶要頂住指數沽出內銀股同本地地產股食糊，毫無疑問一定要炒高中移動，睇嚟中移動又會再一次等做藍燈籠。
突破阻力可見四蚊
中移動炒得高嘅話，咪又係上番90蚊咁大把，呢啲股絕對係大師級先有本事推介。如果博中移動有本事炒上，較有把握嘅選擇就係從電訊設備股落手，呢個板塊近兩日走勢唔差喎！中興通訊（763）前排發盈警，但股價仲企得穩陣腳，噚日升半成，係強勢嘅表現。
先前工信部發佈《移動通信轉售業務試點方案》，主要係想引入民營企業參與電訊業務，呢批民企可以透過向現有營運商租網去經營，即係唔使自己投資建網，但唔好處就係俾現有營運商食夾棍，民企會賺少一浸，掉轉就好難同啲大哥去競爭，要食大哥食剩嘅餅碎先有運行，不過，有得揀嚟做，總好過冇得揀，對民企電訊設備股總算係好消息。方案𠵱家正在諮詢，睇怕阻力未必好大。
事實上，呢批電訊設備股圖表都幾靚，其中京信通信（2342）股價回吐到保歷加通道中軸又有支持，噚日做一支大陽燭，短線要考驗3.50元嘅舊年11月同今年1月高位阻力，如果突破到，分分鐘見4蚊，短線就以收市價跌穿保歷加中軸3.10元為止蝕。
晉佳
本欄逢周一、三及五刊出