林鄭月娥透露梁振英上任以來，努力學習公務員的程序和架構，又係呃人！
今年施政報告靜雞雞取消了施政綱領這本小冊子，冇公開解釋，據記者透露，新聞處長解釋係因為冇人睇，所以便取消，理由相當牽強，因為施政綱領用來畀傳媒用作監督施政承諾執行情況，並非畀一般公眾睇，少人睇係正常不過。
按過去編制工作傳統，特首未草擬好施政報告，部門常任秘書長已經早早動工，撰寫呢一份施政綱領，其間不斷將施政報告會提出的新政策，納入綱領中。日後特首要追蹤大小政策執行情況，便按圖索驥，絕不遺漏，有立此存照之意。
施政綱領章節乃跟施政報告章節劃分，一目了然，了解公務員思維的人都知，要佢哋接受新事物，採納新程序並不容易，同樣，已行之有效的舊制度要取消，亦同樣不容易，除非係由上而下決定。取消施政綱領，應該係梁振英決定，原因為何？公眾至今仍蒙在鼓裏。
估計梁振英以「成熟一項推一項」作風，認為公共政策毋須規劃協調，市民輿論嘈，就跑去救火，左撲右撲，師老無功。冇計劃及秩序推動施政，自然毋須綱領作依循，也唔希望立案後將來俾人抽秤。以佢處理自己選舉政綱手法，講一套，寫就另外一套，點會希望一年後俾人有機會根據白紙黑字，證據確鑿咁替他做施政audit。選舉時佢講到識飛，討好環保團體，擺出停建焚化爐姿態，但政綱文字就留定後路，準備隨時縮水轉軚。
梁粉訂政策 避開監督
今日輿論抽秤佢從當日停建焚化爐立場轉軚，佢就大條道理話政綱唔係咁寫，最契弟係環保局正副局長，竟然話佢冇講過永遠唔起焚化爐，詭辯術似足梁振英。大家明白施政綱領並非由梁粉或中策組去寫，而係由政策局公務員執筆，公務員當然唔敢諗定日後縮水，用模稜兩可文字，因為佢哋都擔心上到立法會俾議員插。
大家只要諗到上任半年「成熟一項仆一項」嘅房策，主動造成房屋需求上升，人人瘋癲搶樓，佢仍厚面皮自吹自擂話政策成功，可知此人係一味靠吹、用口技施政之徒。
整走施政綱領，擺脫官僚及議員掣肘，再成立由梁粉主導的大量委員會去訂政策，出台後得與唔得，都可胡混過關，避開一切監督。
香港綱紀敗壞，由梁振英開始！
添馬男