曾經演出唔少電影角色好似鋼牙嘅鄭祖（原名鄭錦榮），上星期五晚喺深圳屋企突腦中風，送入醫院搶救後，第二日就過咗身，終年51歲。鄭祖嘅家人前日喺深圳為佢舉殯，噚日再喺香港紅磡福澤殯儀館搞追思會。搵鄭祖拍戲嘅周星馳雖然人冇到，但都送上花圈。
難忘樂天性格
鄭祖未拍戲前係做舞蹈員，所以一班舞蹈員同行，仲有圈中人謝天華、谷德昭、李𤨪琛、毛舜筠及鄭中基等都有出席送佢最後一程。監製戚其義就帶住簡慕華等一班無綫藝員，前嚟悼念，簡慕華走嗰陣時仲喊到眼都紅晒。謝天華話：「鄭祖係我做舞蹈員時嘅大師兄，電影冇合作過，最難忘佢嘅笑容，份人好樂天，令到每個朋友都好開心，對上一次見已經係兩年前，聽到佢過身消息覺得好突然，咁後生咁嘅年紀，冇理由走得咁快，不過呢個已經係事實，希望呢位老朋友一路好走。」
撰文：馮仁昭
