舊年7月，滙控（005）旗下嘅美國滙豐因為牽涉洗黑錢活動搞到滿城風雨，華華仲以為班高層第日實冇運行，點知滙控噚日就宣佈，美國滙豐行政總裁唐愛韻（Irene Dorner）升職做常務董事，下月1號就職。唔通呢啲就係「大難不死，必有後福」？
三人出席聽證會 命運各異
Irene喺舊年7月，先聯同滙控零售銀行及財富管理業務（RBWM）行政總裁郭兆德（Paul Thurston）同規管部門主管David Bagley，一齊出席美國參議院旗下調查小組委員會嘅聽證會，三位舉手宣誓嘅場面真係經典。結果點？David Bagley喺聽證會上表明計劃引咎辭職，第一個倒下，郭兆德就喺舊年年底宣佈「退休」，反而剩落嚟嘅Irene就更上一層樓，真係同人唔同命。
據滙控行政總裁歐智華解釋，Irene升職係「反映集團確認佢管理嘅美國業務工作重要性同複雜性」。美國業務有幾複雜？睇吓要不斷撥備就知啦。
講到引咎辭職嘅David Bagley，滙控就請咗畢馬威前合夥人Ruth Horgan坐佢個位，4月2號上任。呢位阿姐喺金融業有成25年經驗，仲有份核過滙控條數，睇嚟要上手冇難度，歐智華呢期似乎特別鍾意用女將喎。
李華華
mailto:[email protected]