舊年無綫熱播節目《盛女愛作戰》，令「剩女／盛女」一詞再次潮起來，仲持續到家陣，好似內地最新一期《理財周刊》咁，有篇文章創出「剩女經濟學」呢個新名詞。
剩男娶村姑 變城市化
話說點解有剩女？都係因為女性經濟獨立，唔使靠男人，而職業女性收入越高，睇得上眼嘅男性選擇就越少。好似南韓咁，有錢嘅「盛女」喺城市博命搵錢，佢哋消費力亦隨之上升，而娶唔到老婆嘅「剩男」就撤出都市圈搵對象，佢哋消費力亦會下降。
所以結論係盛女率越高嘅城市，經濟越繁榮，消費水平越高，而高消費嘅壓力又進一步驅使剩男要賺錢返鄉下娶老婆，再帶村姑入城，城市化進程就喺呢個「盛女─剩男─村姑」嘅人口流動中逐步升級，令都市圈同鄉村城鎮化趨勢雙翼齊飛。其實呢兩批男女最終都係為經濟繁榮付出代價啫。