前海概念大炒特炒，內房股百仕達（1168）投資物業遍佈深圳，肯定受惠，加上現金充裕，值得睇高一線。
截至去年6月底，百仕達手頭淨現金達39億銀，折算每股現金達1.10元，較現價0.80元多近四成，名副其實現金牛一隻；如果計埋投資物業等資產，每股NAV達2.11元，現價大幅折讓逾六成，絕對係內房股中超值之選。期內僅有「紅樹西岸」小量貨尾盤可供出售，故中期盈利倒退26%至2.9億銀，但現價計年度化市盈率5倍唔夠，實在平得過份，上海外灘建築面積近10萬平方米嘅商住項目，將於2014年完工，未來一兩年乃集團收成期，盈利有望出現幾何級數增長。
去年內房股炒到飛起，升幅動輒以倍計，百仕達僅升19%，嚴重跑輸大市，呢轉有望借前海概念大炒特炒。百仕達昨收0.80元，升6.7%，突破近期阻力，股價熱身後隨時起動，先以現金價1.10元作目標，潛在升幅達38%，屆時PB都只係0.52倍。
唐牛