歐美經濟麻麻哋，全球商家都打強國人主意。波子保時捷都唔執輸，出年開始將超級跑車「918 Spyder hybrid」引入中國，華華齋睇相都覺得架車好招搖，一架盛惠1340萬人仔。
第一架明年交貨
保時捷中國區阿頭Helmut Broeker話，強國人對呢部車興趣好大，話都冇咁快就落order，第一部supercar明年上半年交貨，跑車喺內地市場一定潛力無限。之不過，華華曾聽聞有山東煤礦老闆買咗N架林寶堅尼，想喺礦場代步，但唔使幾日就刮到個底盤花晒，啲車就咁hea喺礦場度曬太陽。如果保時捷真係要大力拓展內地跑車市場，教育同維修服務配合，必不可少。
保時捷出年仲會推出新款SUV，公司相信憑呢兩大皇牌，中國會成為波子最大市場。至於BMW同Benz就進化到去掘新金礦，下一站係印度。BMW計劃向印度賣小型車，Benz就會出A-class嘅入門版本，總之各自各精采。