狼班子要媚共，都唔使攞香港西九文化區嘅戲曲中心嚟較飛㗎，事關呢個今年底動工、預計2016年落成嘅戲曲中心，英文名竟然係用大陸拼音嘅Xiqu Centre，而唔係香港慣常用嘅Cantonese Opera Centre，激到好多市民紮紮跳，話會向政府投訴，務求拆走呢個賣港招牌。
矮化粵劇地位
狼振英上場後，好多赤化舉動，最新罪證可算將西九戲曲中心英文名大陸化。喺香港，粵劇英文通常叫Cantonese opera，例子有八和會館網頁；旅發局介紹粵劇則用Chinese opera。但唔知西九管理局點解無啦啦要用大陸拼音Xiqu取代，唔通連opera呢啲帶有鬼佬歌劇味道嘅名，都要禁用？
有網民引述陳雲鬧呢個已花以億元計公帑扶植嘅西九文化區，竟然犯啲咁嘅低級語文錯誤，諷刺話：「如果要依循採用Xiqu拼音的原則，粵劇嘅英文請改用Yue Kuk （粵曲）或Kwang Tung Tai Hei （廣東大戲），不要用Cantonese opera」。知名網民朗思拆解，話Xiqu普通話譯音可以係屎渠、屎橋同死豬之類，諷刺呢個名除咗北佬之後，搵鬼睇得明？
香港自治運動更為此發表聲明，話呢個繙譯係罔顧香港粵語文化，甚至矮化粵劇喺香港嘅地位，呼籲市民抗爭，齊齊向政府集體投訴，最好將政府賣港行徑公諸於世，直至政府改名為止。
mailto:[email protected]