〈怒〉修咸頓改由阿根廷名將普捷天奴領軍，表現唔見得好過艾堅斯時代；前日喺英超佢首次帶隊，結果只係同來訪嘅愛華頓踢成0:0，保持聯賽6戰不敗；而修咸頓都算賤格，將本場刊上艾堅斯嘅名同相，全部捽走晒。雖然艾堅斯得唔到會方尊重，不過喺球迷心目中仲好有地位；前晚聖瑪莉球場啲球迷，除咗戴上佢個樣嘅紙板面具，同高舉支持佢嘅橫額（圖），仲高唱「只得尼祖艾堅斯一個，我哋好愛你呀尼祖」。但普捷天奴嘅EQ都算高，賽後咁話：「我要感謝歡迎我嘅球迷。班球員今晚打得好好，製造咗至少7個入波機會，美中不足係贏唔到波囉。」