【灣仔】下個月就34歲生日嘅無綫男演員趙永洪，自從喺處境劇《畢打自己人》彈出之後，拍劇嘅機會越來越多，好似最近好受師奶歡迎嘅《愛．回家》當中，演一個亦正亦邪嘅收買佬鍾標就好稱職。而佢嘅緋聞都唔多，係傳過同同劇嘅朱慧敏咁大把，原來趙永洪已經有個身材出眾嘅圈外女友，唔怪得對住其他女演員唔動心啦。
前日下晝4點鐘左右，鍾標上身嘅趙永洪着住大褸孭住背囊同女朋友蹺手喺灣仔行街。趙永洪個女友戴住眼鏡素顏，好有鄰家女孩感覺，不過佢雖然着住件鬆身毛衣，但上圍依然有奪衣而出嘅感覺。
對女友好細心
趙永洪同女友行咗幾間舖之後，好快買到嘢，跟住趙永洪就拖住女朋友行去大街等車，由於交更時間所以唔多的士，兩個人就企喺條街度傾偈，平時喺劇集裏面好cool嘅趙永洪喺女朋友面前風趣好多，引到女朋友笑得好開心，趙永洪講嘢都好大動作，一個唔覺意仲胸襲咗女友一下，好彩女友唔介意，等咗7分鐘左右終於截到車，趙永洪俾女友上車之後至上車，真係好有風度。
採訪、攝影：陳辰、楊浩賢
