〈怒〉今屆非國盃上周六開打至今，3輪分組賽都爆冷，熱W只開得馬里一場，其餘5場仲全和，特別周一C組兩戰，上屆冠軍贊比亞面對埃塞俄比亞，埃國25分鐘博得12碼，但沙拿甸薩特主射宴客，36分鐘又有門將達斯維領紅，結果完半場前畀贊比亞嘅麥蘇馬先開紀錄。不過埃塞俄比亞球員好似長跑選手咁有韌力，喺下半場由艾丹尼基爾馬（圖）追平1:1，1.48倍贊比亞熱W又失手。尾場尼日利亞出擊，熱W得1.65倍，仲先開紀錄，不過下半場布基納法索把握對手伊菲岩布斯紅牌被逐，戰至補時4分鐘，戲劇性由艾蘭查奧爾建功，追成1:1，連續兩場開1:1之餘，半全場又係半冷嘅「主/和」。