相信唔少英超球員都好葡萄曼聯班球員，正當𠵱家英國天寒地凍、喺戶外都手硬腳硬嘅時候，紅魔拉大隊到卡塔爾集訓，個個都着住短袖衫，享受溫暖嘅陽光，但領隊費格遜就喺英國有嘢做，冇去到。
周日喺風雪下踢完對熱刺嘅聯賽後，曼聯就急急腳上機，去卡塔爾嘅多哈。近排曼徹斯特市氣溫喺零度左右，唔係落雪就陰天，而喺中東嘅多哈就廿幾度，陽光普照。落機之後，曼聯球員個個換番套夏天衫、聽住歌，去訓練場地輕舒腳頭，踩吓健身單車。紅魔會喺卡塔爾留4日，星期四返英國，準備星期六迎戰富咸嘅英足盃第4圈。
費格遜向來都鍾意帶班球員周圍去，喺季中輕鬆吓，例如費Sir上季就帶過隊波去蘇格蘭打高爾夫球。不過，我求大俠今次睇晒啲相，都唔見佢老人家嘅，原來官方話費Sir約好咗喺英國出席慈善活動，所以唔得閒帶隊去卡塔爾。費Sir不嬲都蠱惑多計，我求大俠覺得慈善活動只係藉口，佢留喺英國肯定別有原因。
疑老費簽沙夏行唔開
近排，班英國傳媒係咁話曼聯好大機會簽到水晶宮嘅韋費特沙夏，所以話唔定費Sir要忙住傾埋單轉會。英國《衞報》指，曼聯為呢名20歲英格蘭射手開價1,200萬鎊（約1.5億港元），好可能喺今周內完成交易，但曼聯同意韋費特沙夏留效水晶宮多半季，到今夏先正式加盟；阿仙奴則否認對韋費特沙夏有興趣。
費Sir除咗要搞轉會，仲要應付英足總。周日對熱刺場聯賽賽後，費Sir對傳媒大鬧旁證走漏眼，見唔到朗尼喺禁區內俾熱刺球員整跌；英足總秋後算賬，要召費Sir去解釋吓佢嘅言論。費Sir鬧球證都鬧咗廿幾年，呢啲解釋應該完全難唔到佢。