公民黨主席余大狀冇做立法會議員後，平日已相當低調專注黨務，但噚日突然有人報料，指余大狀本月中買咗個跑馬地樂陶苑單位，買完後先知單位之前有人跳樓，係凶宅，報料人講到似層層，話買家想踢契。
八方即時問余大狀，點知余大狀聽到後即時笑咗出嚟，話自己最近根本冇買過樓，又話八方已經唔係第一個記者向佢查詢呢個傳聞。
余大狀又話，對現時住開嘅單位十分滿意，根本冇需要、亦冇諗買新樓，所以唔明點解會有咁嘅消息傳出。但余大狀話，最近打聽到呢個錯誤傳聞，其實係出自一個八卦經紀口中，仲話個經紀早排煩到打電話去佢屋企，「我諗係有個經紀呢排不斷散播謠言，我都唔知道乜事，真係好無厘頭」