政制及內地事務局副局長劉江華履新後，噚日首次以問責官員身份出席立法會政制事務委員會，同以前一班同僚「敍舊」。素有左王之稱嘅劉江華，以前開會成日同泛民互片，時移世易，𠵱家嘅佢不知幾咁客氣，會上一直笑騎騎，冇晒「寸步不讓」嘅霸氣，仲話要多啲同民主黨主席劉慧卿溝通溝通㖭。
以前議事堂之內，卿姐都不時同劉江華開拖；見到呢位舊朋友「重返」議會，卿姐噚日最初都用一向火辣辣作風質問劉江華，話泛民不嬲都同佢有好多牙齒印，如果由佢嚟同泛民收風，會唔會事倍功半？仲苦苦追問呢位前同事，係咪會好似以前咁「寸步不讓」先？
換着係以前嘅劉江華，一定拍枱發炮反駁卿姐喇，但今時今日嘅佢，要靠議員多多支持，所以面對卿姐嘅逼迫，劉江華堅持笑笑口回應，承諾一定會同各位議員多溝通，特別點名話，一定會包括劉慧卿在內。
長毛：敗部竟復生
聽到呢句，卿姐都冇再發炮，唔知係咪等緊劉江華約會佢溝通呢？有口痕花生友話呀，佢兩位以前唇槍舌劍，𠵱家似耍花槍多啲喎。為慶祝舊同事「回歸」，長毛都特別帶同寫有「保皇牆頭草，敗部竟復生」嘅標語做「賀禮」，但劉江華見到呢個「篤眼篤鼻」嘅道具，竟然都沉得住氣喎。政制及內地事務局局長譚志源噚日唔肯為初試啼聲嘅劉江華打分，只贈言話：「面係人哋畀嘅」，唔知有冇乜特別意思？
mailto:[email protected]