咖喱牛腩，有辣有唔辣。牽牛同咖喱將總結每周球賽，見到抵讚嘅事，牽牛定必重重有賞，用幾百字大讚吓佢；但見到抵鬧嘅人，咖喱就會毫不留情，省佢一餐。
本欄主旨一向要讚，但阿仙奴今季真係讚唔得落手，所以一直冇咩點提佢哋；不過周日倫敦打吡戰雖然輸波，阿仙奴翼鋒禾確特確係抵讚，10萬鎊周薪抵畀。
周日透過廣東電視台欣賞呢場直播，前港甲名將、名主播何輝批評阿仙奴領隊雲格，處理禾確特續約問題極之兒戲，佢鬧一支具規模嘅英超球隊，竟然為咗氹禾仔續約，安排佢踢唔擅長嘅正前鋒位。當然有頭髮邊個想做癩痢，如果可以好似車仔咁，一下子就出到20萬鎊周薪同一名32歲嘅左後衞續約，就當然冇煩惱。之前擔心禾仔續約後又有番惰性，不過今仗墮後打番右翼，發揮佢老本行嘅水準，面對老師兄A高完全未驚過，基本上全場最有威脅嘅兵工廠埋門，都由禾仔帶動，包括追成1:2嘅入球，尾段亦都幾乎追平。
過去英超冠軍總有超然領袖級人物領軍：阿仙奴有韋拉；曼聯有簡東拿、堅尼，呢個位置慢慢由朗尼去擔任；車仔有泰利；曼城有高柏尼。阿仙奴今季最大問題，係面對強隊已經冇晒氣勢，甚至有未打先輸嘅感覺，對曼聯、曼城亦然，不過今仗對車路士，精神面貌有啲改善，落後兩球亦都把握到拉近機會，禾仔嘅感染力喺球隊亦都發揮作用。之前阿仙奴比賽，一落後就越打越靜，冇嚟火氣，唔知比分甚至以為佢哋領先，今仗開始有氣氛上轉變，我認為係好事，不過我更期待禾仔開始發惡嘅鏡頭出現。文：牽牛