保險公司為鼓勵經紀跑數，獎勵佢哋出外豪華遊絕不手軟。美國萬通（MassMutual）下月農曆新年期間就會請200位top sales豪遊夏威夷一星期，聽聞淨係每晚酒店房租都要6000大元，每位團費起碼5至6萬，成個團要1200萬，仲豪爽過恒地（012）老闆四叔呀。
咁點樣先可以去到呢個豪華團呢？全年簽單賺到48.8萬佣金就得嘞。一位萬通經紀講解，假設簽到一張一萬銀嘅單，首年可以分佣50%，簡單來講，一年簽到100萬銀以上嘅保單，應該都可以有份豪華遊。
佢哋往年去過北海道浸溫泉，仲有布達佩斯、墨爾本、阿姆斯特丹同埋聖彼德堡，今年去完夏威夷，已經預告明年飛去意大利，要食真正意菜同血拼一番，經紀們就要簽多啲單了，呢種鼓勵模式真係好值得各大老闆考慮。