昨天附圖的獎座，貨真價實是我在這次「HK100」的「紀錄品」（未敢誇稱戰利品），看似滿載，卻不盡然。參加選手能夠在20小時內獨力走完100公里的賽程都可獲頒銀獎，而個多月前，我才和其他隊友以18個多小時完成同樣路距的「毅行者」，且相對難度亦較大。因此以我認識，兩項賽事都有參與的山友為例，十個有九個的最終時間，都係「HK100」佔優。至於乜嘢人係第十個咁特別？之咪係我囉。
肚子作反 靠「尾女」抵壘
一切要由備戰開始講起，聖誕期間，如常操練，一天大清早，郊野氣溫才得幾度，我未待熱好身就起步，而且為了驅除寒意，步速亦比平日更急、更快。一段路後，感覺右腳踝關節有輕微異樣，活動欠暢。當時不以為然，事後才發現腫似一顆栗子，該是熱身不足導致扭傷。而寒冷天氣非但會減低身體對痛楚的反應，且會影響康復進度。比賽在即，惟有趕急求醫，骨科推拿針灸，幾管齊下，腳傷方見好轉。可惜一波未平，一波又起。
比賽前夕，身在公司忽然發冷，似作感冒，心生不妙，旋即回家休息，差點以為第二天不能作賽。翌日開步還是缺態，最糟的是肚子不舒服，且沒有胃口進食，長途賽事，補充能量是「重中之重」，唔想食都要夾硬嚟。不過每次有嘢落肚都會換來一陣作痛，所以全程感覺都是在進行未完的消化過程，當然也就是消耗和補給之間出現缺口，欲發力無從。
其實前段賽事，我已刻意放慢，以保體力，不過越行越後，實在消磨鬥志。沒有隊友在旁（那幾位一早已快放），總得要靠自己孤身走我路……唔係喎，仲有女可靠噃！正當心灰之際，竟然見到一位相熟女山友，簡直就係苦海慈航。我當厚着臉皮，哀求結伴同行，因向來都知她的步速（pacing）最穩，能夠緊隨其後，定能順利抵壘。卒之，就咁形影不離地共走咗十多個小時，最終都仲可以攞埋獎，呢位「尾女（我一路都吊住佢尾嘛）」居功至偉。
完成賽事後，回家小睡卻已乍醒，然後全日未能離開家門，因為肚子裏庫存太多未經消化的貨尾，和期間強行壓抑的排量需求，一次併爆，由朝瀉到黑。晚上量體重，短短兩日幾，足足輕咗7磅！
想起某間健康食品公司的宣傳句語：「馬上減肥，方法問我」，唔知會否考慮禮聘我為代言人？
盧先亞