咖喱牛腩，有辣有唔辣。牽牛同咖喱將總結每周球賽，見到抵讚嘅事，牽牛定必重重有賞，用幾百字大讚吓佢；但見到抵鬧嘅人，咖喱就會毫不留情，省佢一餐。
不滿、生氣、憤怒、無奈、悲嘆……相信喜愛費托嘅球迷都已經去到第5階段。小弟雖然唔係費托粉絲，但見證過佢喺利物浦嘅風光日子，𠵱家見佢30歲都未夠就變成咁，都不由得悲嘆造物弄人。
星期日場英超，仲記得有球費托用禾確特式嘅屈速，硬爆阿仙奴後防，仲拋甩對手幾個身位；嗰陣我心諗，唔通丹巴巴亞嚟到之後，費托真係翻生？點知我開心得太早，費托再推多腳大力咗，將個波送咗畀施捷斯尼。唉！以前喺利記嗰陣，呢啲半單刀機會，費托至少都可以完成射門，𠵱家就做咗人哋中堅，幫對手解圍。
小弟都想幫費托嘅沉淪諗啲原因。冇輸送？車仔創造力強嘅球員大把；雪到硬咗？但費托已經打咗半季正選；同領隊唔啱？賓尼迪斯已經係帶佢去到職業生涯高峯的恩師……咁惟有話費托嘅能力的確冇啦啦跌咗。
每個球員都會面對能力下滑嘅困境，有人遲，有人早，但能力跌唔代表廢，最緊要識轉型。傑斯喺千禧年初嗰陣俾人插到暈，話佢年屆30就打唔出當年追風快翼嘅水準，但佢轉打中路，咪又踢到今時今日。希望費托唔好灰心，如果真係踢前鋒踢到頭頭碰着黑，咪試下中場同翼鋒；喺車仔度真係腳頭無靈，就不如要求離隊換個環境。留戀過去係冇用，安於現狀亦只會埋葬未來，面對現實，放眼將來先至緊要。文：咖喱