港股炒到有啲水尾feel，揀股份開始唔睇FA（fundamental analysis），只睇TA（technical analysis），其中一隻代表作就是李寧（2331）。
呢隻股份由12月初開始炒復蘇，由4蚊升到𠵱家近7蚊，如果用FA睇，大家估2013年最多只會微利，海迪就手鬆啲當佢今年賺到1億，現價計亦相等於市盈率超過70倍！用支槍指住海迪個頭都唔會覺得佢抵買囉。
至於公司早前宣佈嗰14億至18億新貨換舊貨大計，執行風險亦高過湯馬斯全旋。咁樣追貨法？證明股票升，有時真係一個憧憬就夠。
但如果以TA來睇呢？李寧個大圓底翻身股價圖望落真係超靚，升勢如虹，如果補得番舊年5月時7蚊嘅小裂口，最高可望9蚊。望住呢幅圖，真係會令人覺得公司前途無限。
不過，有芬佬朋友就向海迪講咗句語重心長嘅說話：「如果思捷（330）賣翻身都有人信，李寧更有潛力玩呢個故事，而且李寧市值爆升之前得30、40億，如有心收集又有何難？」海迪再望一望李寧的股份存倉，有超過83%的股份集中在五間券商底下。或者這是一點啟示，解釋李寧為何升得咁急了。
海迪