浸大噚日宣佈成立「饒宗頤國學院」，由國學大師饒老出任永遠榮譽院長。校長陳新滋喺典禮上話，希望透過國學院進行研究同教學，培訓國學人才，兼且聯繫全球國學家，將中華民族過去幾千年嘅文化整理成一本書，好似《聖經》咁，影響下一代喎。
收到600萬捐款
國學院雖然靠捐款營運，但以饒老之名，加上深圳市政府支持，財源應該冇問題，噚日就收到合共600萬捐款。陳新滋為答謝饒老畀面，特登提咗首詩，橫睇第一句就係「饒宗頤浸大國學院」，仲寫咗上青花瓷盆上面；年屆97嘅饒老，多次起身拱手講多謝。
國學院署理院長陳致話，國學院仲喺籌備階段，𠵱家聯絡緊國際嘅漢學猛人加入，會先出版院刊，首年招收兩個博士生，研究領域好多，當然唔少得饒老嘅作品，可能仲會去深圳上堂㖭。