國教風波後，教育局局長吳克儉似乎輕鬆咗好多，至少叫佢落台之聲，已經無以前咁響。八方聽聞劫後餘生嘅佢近期靜雞雞去咗視察兩幅地，包括辣㷫耶穌會教士嘅粉嶺皇后山地皮，以及激嬲咗浸大校董會嘅九龍塘前李惠利校舍土地。事關呢兩幅地明明話要用嚟起教育嘢，前者話要建私立大學，後者畀浸大起學生宿舍，但政府忽然間放風話要收返或縮細，相關持份者唔嬲就假。
儉儉視察完之後，兩幅地究竟有冇新動態？八方聽聞，皇后山幅地皮會繼續留嚟起大學㗎嘞，至於浸大爭唔爭得贏成幅地，就要睇佢哋牙力夠唔夠，事關政府都覺得，中醫院唔一定要起喺嗰度；齋起宿舍，夠晒地啦。