完成十大中文金曲頒獎禮，我和香港電台《頭條新聞》的拍檔羅啟新，做了一個「樂壇施政報告」的棟篤笑，現場反應好過聽CY的施政報告，據說某些議員甚至想索取原稿。這個棟篤笑我不敢領功，榮譽盡歸羅啟新，我只是添磚加瓦。內容如下：
羅：我地今日發表樂壇施政報告，希望為歌手謀福利。
曾：要訂定歌手貧窮線，凡賣碟少過五百張，政府包底補貼。
羅：推出「港人港碟」政策，香港人要聽香港音樂。推出辣招，凡一個月內買第二隻外國音樂碟，加價罰息。
曾：歌手零雙非，非本地歌手非華語歌曲，禁止香港上演。
羅：保證基層歌手要上榜，加快歌手上榜輪候冊的速度，保證歌手三年內要上榜。推出「歌者有其碟」計劃，保證歌手有碟出。
曾：我估「歌者有其獎」實際啲喎。
羅：政府不插手頒獎市場。改善Band友生活，保證佢地唔駛住劏房，可以住Band房。
曾：但好多Band房本身已經係劏房。
羅：歌手埋怨表演場地不足，推出溶洞歌手計劃，喺溶洞唱歌。鼓勵歌手轉型做政總歌手，係政總獻唱。
曾：政府總部唔係普通歌手表演，只適合電視台高層跳騎馬舞。
羅：咁PSY？
曾：為減低貧富懸殊，降低堅尼系數，我們鼓勵歌手着比堅尼谷碟。
羅：Excellent，非常好。着比堅尼，比較堅料至好嚟。
曾：希望樂壇可以「穩步求財」，大家有聲出有糧出。
羅：你點睇「年少無知」？
曾：「天與地」神曲，無得頂。
羅：唔係講隻歌，我係講阿G.E.M.。
曾：G.E.M.，如果你因為得唔到獎而情緒困擾，可以打嚟傾傾「歌手情緒輔導熱線」，唔好淨係上網拍片。
羅：如果你認為個選舉機制講一套做一套唔公平，你可以講一聲：
合：你呃人。