認錯有回報㗎！比亞迪（1211）老闆王傳福早排公開認衰，查找各樣不足，比亞迪嘅股價就不斷做好，股民似乎想畀個機會王老闆。雖然噚日個收市價26.8蚊，較歷史高位85.5蚊仲差一大截，主要股東股神畢菲特應該可以稍為鬆一口氣，起碼唔再係一路尋底。
王傳福除咗承認汽車業務喺銷售渠道、品牌宣傳同埋品質三方面都犯錯，仲好知道衰喺邊度，佢話：「為甚麼一些官員，一些人不喜歡我們的車，不願坐我們的汽車，是覺得丟面子，是因為我們沒做好。」咁又係，中國人最講面子同行頭，坐比亞迪點都唔及坐歐洲車咁威，女士攞手袋都寧願攞個H字頭㗎啦。