梁特首失驚無神提起「空置稅」，目前香港樓宇空置率得4%，根本唔算嚴重；於市場經濟，空置一定有佢原因。
以內地男女分佈比喻，目前70後未婚男士比女士多出逾一倍，於男多女少下，女人應該唔憂嫁。偏偏熱播相睇節目好似《非誠勿擾》、《緣來是你》咁，有大批女仔願意拋頭露面，等雀屏中選。何解？因節目中高質素嘅女仔，一般都要求過高睇唔啱，有部份就「姣」到走火入魔勁趕客。
由此可見，事出必有因。經個人選擇及市場配對後，即使內地男多女少，仍有女生「剩」下來。香港土地求過於供下仍出現空置，背後好大機會係因為未到價。作為政府，冇理由在買賣雙方仍處拉鋸階段時逼人減價賣。
再者，間屋點用係個人選擇，自由市場下根本唔可以干預。好似內地首富宗慶後嘅80後索千金，至今因怕俾人呃而堅持唔拍拖。按「空置稅」邏輯，難道要為解決男女供求失衡，向佢開徵「剩女稅」？
Fifi
本欄逢周二、四刊出