最無奈 馬德里體育會
周日西甲，馬體會靠阿祖安盧比斯及佐治高基各入一球，主場以2:0擊敗利雲特，繼續保持今季主場全勝的佳績。不過，馬體會今場有法卡奧受傷，在下半場被換出，賽後證實肌肉拉傷，要缺陣3周，嚴重影響球隊的攻擊力。贏了場波，但失了主將，馬體會肯定最無奈。
最𤓓 阿仙奴
周日英超，阿仙奴作客車路士，上演倫敦打吡，兵工廠上半場捱打，半場落後0:2。雖然換邊後形勢有變，但最後都以1:2輸波。阿仙奴近3場聯賽1和2負，打完22輪後只得34分，排名第6，與利物浦及西布朗同分，是領隊雲格（圖）上任16年以來的最差紀錄。
最無情 熱拿亞
熱拿亞管理層冇耐性又無情，一季入面第2次炒教練。他們在周日主場以0:2不敵卡坦尼亞後，高層決定解僱教練迪尼利。其實，熱拿亞在去年10月已經炒過一次教練，迪尼利接手爛攤子；但成績未見改善，13場聯賽2勝2和9負，所以他執教4個月後，又慘食無情雞。
最爆 馬里
和！又和！馬里（左）終於成為首支在今屆非國盃贏波的球隊。上周六的兩場A組比賽以及周日加納對剛果民主共和國的B組頭場，這3場賽事都最終和局完場。到馬里對尼日爾的B組尾場，兩軍踢到84分鐘都互交白卷，難道今屆會和足4場？不！馬里的施度基達攻入全場唯一的入波，助球隊以1:0勝出。
網友討論區
「波亞斯係掂」
topwai~威威：「曼聯今季畀熱刺搶咗5分，真失敗。波亞斯係好嘢嚟，好彩車仔唔識貨放佢走。 」
ysllmf：「有球香川禁區邊拉人都冇吹，真係離譜。噚晚manu好明顯唔夠熱刺快同體力化，只係靠RVP把握力，下半場捱打只好狂犯規。」
「費托續頹俾人插」
末日未來：「明顯係削髮以明志，加強信念，但昨晚依然不濟，太焦急惹的禍。」
「施治打到上晒身」
stamzico：「上半場成隊阿記好似未瞓醒咁，車仔幾次快速反擊都搞到後防風聲鶴唳，有段時間阿記控球率仲低過3成；下半場先正常番，搶番唔少攻勢，仲可以㩒住車仔嚟打，奈何施治上晒身，加埋前鋒把握力差咁啲。」
資料來源：香港討論區