【深圳直擊】喺周星馳作品《國產凌凌漆》演鋼牙嘅性格演員鄭祖（原名鄭錦榮），上周五晚喺深圳屋企因腦出血被送院，搶救無效，延至上周六過身，終年51歲，佢生前同太太離異後，遺下兩子一女。噚日鄭祖喺深圳舉殯，老友谷德昭同林子聰都專程去深圳送佢最後一程。
走得舒服安詳
對演戲充滿熱誠嘅鄭祖，近年因為喺內地經營酒吧生意，幾乎大部份時間留喺深圳，拍戲產量明顯減少咗，遺作係演出谷德昭嘅電影《百星酒店》。
噚日中午約12點幾，近百名親友在沙灣殯儀館出席鄭祖嘅追悼會及火化儀式。戴咗黑超嘅谷德昭不時同鄭祖大女Zoe喺靈堂傾偈，谷德昭同鄭祖相識於微時，佢都有幫手搞鄭祖嘅身後事，噚日佢喺靈堂出嚟嗰陣，都有除低副超抹眼淚，佢話：「阿Joe（鄭祖）真係走得好突然，不過聽佢個女講，佢走得舒服安詳！」
鄭祖嘅大女Zoe喺微博留言：「多謝各位對鄭祖我的爸爸的思念，他有你們的祝福已很好，請大家也不要為他太難過，他只是去了一個更好的地方，這就是天堂！他會在天堂祝福我們的！」
今日喺香港紅磡福澤殯儀館會再有一個鄭祖嘅追思會，相信會有唔少影圈中人出席表達心意。
撰文：馮仁昭