渣打香港經濟師劉健恆（Kelvin）平時報告就寫得多，今年仲出埋書，講佢最叻嘅離岸人民幣。就咁講名，大家可能唔係好知Kelvin係乜水，自從舊年年頭渣打亞洲區總經濟師關家明退下火線後，身為徒弟仔嘅佢就接力，拍埋外籍同事、高級外滙策略師羅銘勤（Robert Minikin），每季講解離岸人民幣最新發展，間唔中評論埋內地經濟。
新書亦由佢哋兩位拍住寫，老細洪丕正寫序，字裏行間力撐香港，指香港喺人民幣國際化過程當中擔當先行者角色，直情遙距呼應身在中東杜拜做緊路演嘅金管局總裁陳德霖。
兩位作者計劃將版稅捐畀奧比斯，幫助內地有需要人士恢復視力同埋推動護眼教育。學到嘢之餘又可以做善事，唔知大家有冇興趣買本返去刨吓呢？