【跑馬地成和道】張栢芝細佬張柏文同女友何佩瑜（Jeana）經常出雙入對，Jeana仲同台灣記者介紹自己男友係商人㖭。雖然柏文老竇俾人拉橫額追數，但依然冇影響佢拍拖嘅心情，早排佢哋仲由大坑愛巢搬咗去跑馬地。前晚7點幾，佢兩個為新居添置日用品。
Jeana前晚同柏文去到跑馬地一間超級市場，柏文喺門口食煙之後，入去超市會合女友，佢哋集中買日用品如廁紙同油鹽醬醋，仲買咗好多零食，足足行咗45分鐘，買咗成車嘢至肯走。
借車仔載戰利品
去到畀完錢因為買嘅嘢太多，柏文登記咗身份證借埋架車仔推返屋企。柏文同Jeana沿住成和道行番近電車總站嘅新居，柏文負責搬啲日用品雜物上樓，Jeana意猶未盡，去咗屋企附近賣雜物嘅連鎖店繼續睇嘢。大概10多分鐘之後，柏文落樓會合女友，Jeana已經買咗一袋賀年佈置擺設同一啲盆栽，男朋友當然幫手畀錢同抬嘢上樓。
採訪、攝影：陳辰、楊浩賢、吳耀輝
