噚日睇關於地產嘅新聞，見報紙嗌施永青做「梁粉」，孫柏文第一個反應係：「估唔到施老闆收得咁密實！」點都好，見報道話政府「拖」同「冇計」時，我就諗點解會咁講。
因為大家可以話97年後，政府喺好多範疇都冇落實政策能力，不過，推冧樓價方面嘅成效，實在無可至疑。一招「八萬五」，就滿足晒喺97年後樓價大冧嘅要求，搞到當時香港周街都係負資產。
銀行向外國人開綠燈
至於話發展商起完樓唔賣嘅「囤盤」現象，乜嘢時候都有。97至03年最多，淨係居屋，當年都「囤盤」數萬，不過，𠵱家話為打擊「囤盤」，唔排除推樓宇空置稅。咁就會令一班以前唔理公營房屋事嘅人，紛紛走去學嗰啲已經搬離公屋、不過唔還單位嘅人，點樣搵個家庭傭工，耐唔耐去個空置單位，開水喉踢郁個水錶，製造有人住嘅假象。
我講過好多次，呢次樓價大升嘅原罪理由，係我哋香港人唔信香港會去搞貨幣政策。要以港元同美元掛鈎方式，外判貨幣政策畀美國聯邦儲備局。佢哋一印銀紙，每1美元湧港，我哋就印7.8港元。我哋香港人，只可繼續祈求花旗國啲人會醒。
樓，係會繼續升，不過，最有值搏率，唔係香港。呢幾年，大家都係玩租金多過按揭供款，而喺日本，七、八、九厘租金回報嘅樓宇周街都係。要買，最緊要係因為租金以日圓計，所以為了冇外滙風險，按揭都要借日圓。
其中一個租金回報咁高，不過冇人買嘅原因，係日本銀行唔肯借錢畀人，特別係外國人同投資者。不過，由舊年12月開始，銀行已放鬆，開始撩外國客借錢買樓，亦即係要買嘅人卒之能追貨，樓價就應該會繼續升，所以，買樓要諗日本。
孫柏文
獨立股評人
http://facebook.com/shuen
本欄逢周二刊出