大鴻輝主席梁紹鴻今年以156億身家，首度打入《福布斯》香港富豪榜第25位，喜事接二連三，大鴻輝首個酒店項目──港島英迪格酒店（Hotel Indigo）周四開張，東亞（023）主席李國寶、旅發局主席田北俊同政務司司長林鄭月娥齊齊畀面出席開幕儀式，星光熠熠。
寶哥哥到場收錢
新酒店開張，林鄭同田少出現都合理，寶哥哥又關乜事呢？原來寶哥哥以聖雅各福群會主席身份收支票，周四除咗酒店開幕，仲有一個捐款儀式。
不過，大家應該最關注寶哥哥身為唐英年老友，曾經幫唐唐選特首，到時會唔會幫口評論一下CY首份施政報告呢？橫掂市民對呢份施政報告都係劣評如潮，寶哥哥點都唔好做「沉默的一群」吖嘛。
地產項目浪接浪
講番呢間灣仔新酒店，根據資料，大鴻輝投資8億發展，引入洲際集團旗下Indigo品牌經營，屬於五星級，提供150間房，主攻商務客，每晚房租起碼2500蚊。查實灣仔會展個場越搞越旺，旅客經常逼爆隔籬兩間酒店，多間新酒店選擇一定係好事。
梁紹鴻早排仲透露，𠵱家發展緊六間酒店、一座商廈同一個豪宅項目，睇來佢決心要由舖王轉做地產商，由炒家變身資產家，令到香港富豪呢個名譽更加堅。
李華華
mailto:[email protected]