上周五，有日本官員話日圓跌到110先驚，即係carry trade有排玩，資金繼續氾濫，內地亦公佈好過預期嘅第四季經濟數據，刺激中資股表現，港股咁就升咗262點，仲破埋頂。做投資者最緊要看風駛隽，如果之前有跟晉佳建議，做咗小量淡倉對沖手上持股嘅話，呢個時候最好平淡倉囉，累閣下輸咗呢筆小小嘅保險費認真唔好意思。
破得頂，就絕對唔係見頂訊號，可以解除戒備再搵短炒機會。由於上周五升市唔見成交顯著增加，暫時唔預計港股會出現急勁升勢，毋須衝入去一窩蜂買股，可以等啱位先買好嘢。
憧憬今年一號文件即將出台，農業股上周五表現唔錯。回想候任國家主席習近平整親條腰，一蒲頭就係去農業大學，仲話「中國是13億人口的大國，玉米、水稻等主要糧食作物，還是要靠自己解決」，所以換屆後，有機會出現更利好嘅農業扶持政策。
調高目標價 睇2.4元
近期農業股走勢確實唔錯，中化化肥（297）同海油化學（3983）都出現浪高於浪走勢，上周五同樣喺保歷加通道中軸獲得支持，然後回升，9RSI維持喺高過50中軸上落，係典型強勢格局，未來大漲小回機會大。論圖表，海油化學喺6元水平出現較大嘅蟹貨區，唔易突破，照咁睇中化肥好啲。
化肥行業近年供過於求，利錢普遍下跌。中化肥早年主力做分銷，近年做埋生產，成績唔錯，增長足以彌補分銷業務盈利下跌，舊年上半年生產分部溢利爆升1.53倍至3.04億元人民幣，整體純利升一成至5.46億元人民幣，隨着生產分部基數變大，盈利可測性亦會高啲，有利獲得更高估值。嚟緊內地經濟回穩，化肥價格跌勢有機會放緩，配合生產業務貢獻增加，中化肥有條件出現更高速盈利增長，舊年市盈率估計13至14倍，絕對有上升空間。
舊年11月中晉佳推介中化肥，目標價2元，𠵱家已經到價，未沽貨就不妨上調目標價去2.40元。
晉佳
本欄逢周一、三及五刊出