長實（001）、和黃（013）上周五宣佈，再委任有「長江一號」之稱嘅行政會議前成員李業廣做非執董，李業廣因而披露自己揸住3萬股長實同超過107萬股和黃。齋講呢批和黃股份，以上周五收市價85.15蚊計，已經值9114萬，假設揸住好耐，2011年全年收股息223萬，淨係股息都多過好多上市公司高層嘅年薪。
76歲嘅李業廣自從97年辭任長實、和黃董事，2006年冇做港交所（388）主席之後，一直冇幫上市公司做獨董或非執董，無端端肯出山，仲要披露些少身家畀大眾知道，肯定唔係為咗兩間公司畀出合共24萬嘅董事袍金啦。不過話時話，斷估李生唔會淨係揸住長實、和黃兩隻股，佢個投資組合究竟有幾多個億呢？