內地上季GDP增7.9%，稍勝市場預期，更終止連續7季增長回落嘅弱勢，復蘇勢頭漸現，其中12月零售銷售增長15.2%，亦勝市場預期，成為拉動經濟嘅主要動力；內需股去年受累經濟疲弱，出現存貨積壓問題，股價明顯跑輸大市，如今陰霾消散，有力重拾升軌。在內地產銷男裝服飾嘅中國利郎（1234），剛突破近期下降軌，前景可看高一線。
截至去年6月底止，利郎半年營業額增長22%，至12.59億銀（人民幣．下同），盈利增長21.8%，至2.78億銀，毛利率更升3.3個百分點至39.7%，數據可人，但存貨及應收賬周轉日數分別增長31%及21%，成為股價死穴，去年全年累跌32%，輸足大市一條街，投資價值卻因此浮現。現價PE僅8.5倍，息率達8.5厘，作為一隻有增長有息派嘅內需股，值博率極高。
利郎上周五收報5.44元，升5.4%，短線以10倍PE做目標，可見6.40元，潛在升幅18%，中線睇7元。
唐牛