老夫子、秦先生同大蕃薯，陪住唔少港人成長。今年係《老夫子》面世五十周年，噚日就有近百名擁躉扮成老夫子，同第二代作者王澤喺屯門市廣場參加生日會，呢個商場喺即日起至2月24日，會舉行《老夫子五十周年懷舊展》。
《老夫子》原作者其實係叫王家禧，現年89歲，佢喺1963年用長子王澤為筆名，推出首本《老夫子》。王澤話自己約20年前、即王老先生約70歲，先接力畫《老夫子》，最初都要由抹抬做起。
八方覺得《老夫子》入面，靚女角色唔多，似乎係八方走漏眼，事關王澤話喺200幾個角色中，其他靚女仲有黃小姐、林小姐同李姑娘，大讚《老夫子》係視覺上嘅阿士匹靈，嬉笑怒罵解市民生活之苦。
狼英咁多「耐人尋味」舉動，會唔會成為《老夫子》主題呢？王澤笑稱《老夫子》只做幽默嘢，唔係政治漫畫，未必會提嘞！
