朋友J說，好驚，真係好驚。剛剛收到銀行的電話，真係好驚。銀行說我層樓的估價，又升咗。408萬，竟然已經升破400萬大關，去到408萬。
我罵了他一句，原來你是來晒命的！升了便好，何來好驚？
J說，你知道嗎，408萬的估價，如果我放盤時再進取一點，開410萬，我足足比買樓的價錢，賺了一倍啊！我買的時候，才200萬啊！多謝CY！真要多謝CY！
我再罵他，未買樓的朋友真係要多謝CY，老老實實，你究竟驚甚麼？
他說，400萬，我咁大個仔無諗過自己可以有400萬！你明唔明嗰種感覺，好奇怪，我食餐飯都好少過400蚊，但我竟然住喺一幢400萬嘅樓；我可能每個月都無4萬銀收入，但我竟然可以賺400萬！
我提醒他，這是紙上富貴，有價無市，錢未算落你袋，400萬暫時是一場春夢，令你一陣亢奮，高潮過後，掀起被單，空無一人，你的手不曾捉住過甚麼，你懂嗎？
朋友J說，我不懂為甚麼要工作，我做一世都賺唔到400萬，夜半無人，其實層樓會唔會恥笑我無用？我感覺窗台在笑我，天花板鄙視我，廁所為我的無用而漏水……
我也嘆了口氣，因為他明顯模仿梁朝偉在《重慶森林》的對白，而他更明顯不是梁朝偉。我只能說，等樓價升而賺大錢，就像守株待兔的故事，好運的時候天天都有兔仔肉食，但如果流年不利，兔仔呢世都唔會嚟；有些地區的樓價，就是一隻沒有腳的雀仔，注定是浪子，永遠唔會返家鄉。
有人站在高山之巔，便會讚嘆造物者的神奇，感嘆自己渺小；都市人無這種閒情，但也有同樣之感，當你站在樓市之顛，你也會覺得自己何等卑微，我們的生死，似乎就取決於美國何時加息。那才是都市人最擔心的世界末日。