狼振英宣佈佢嘅第一份施政報告之後，再次令人睇清楚佢「講就天下無敵，做就有心無力」。八方聽聞，狼英雖然一早同阿爺打底，話要畀時間佢，但據聞有京官私下話，估唔到份嘢真係咁流，差在未指住狼英鬧佢「你呃人」。早排八方同一政界人士食飯，問佢阿爺點處置狼英？佢飲大兩杯爆料話阿爺有「many plans」，點只plan B咁簡單喎。
「我們有many plans」
話說呢個政界人士早排見過某個內地猛人，對方鬧狼英喺選舉時已經開始呃阿爺；當日唐唐鬧出僭建風波，阿爺特登搵劉延東去見狼英，問清楚佢到底有冇僭建，否則一旦換馬畀佢做特首、而佢又有僭建時，咪好大件事？點知狼英拍心口話冇！
呢個猛人又話，原本阿爺只睇結果，不問過程，狼英搞得掂香港，阿爺話之你呃乜嘢！問題係佢搞到香港一鑊泡，唔易收科呢。原來呢個政界人士曾經問個猛人，阿爺係咪有Plan B先？對方斬釘截鐵話「冇」，但就唔知講真定講假咁話：「我們有many plans！」嘩，many plans？即係阿爺有大把方法處置隻狼？
到底呢啲plans，包唔包括換人？呢位猛人冇講，亦唔知佢係咪飲大兩杯亂咁噏，但八方好相信，狼英如果做得唔好，阿爺唔會就咁放過佢，唔好唔記得，中聯辦主任張曉明，隨時直通天庭囉。
mailto:[email protected]
齊心一意，打救行騙長官梁振英
http://www.tomonews.net/game/bslapcy/web/